Feiknasterkum A-úrslitum í B-flokki lauk nú rétt í þessu og var mjótt á mununum þar sem efstu tveir hestarnir fóru yfir 9,0. Frami frá Ketilsstöðum og Elin Holst settu tóninn strax á hægu tölti þar sem þau höfðu mikla yfirburði og héldu þau forystunni allan tímann þó svo að Nökkvi og Jakob hafi sótt hart að þeim á bæði brokki og yfirferð. Þriðju voru svo þau Hátíð frá Forsæti og Jón Páll Sveinsson

Bríet Guðmundsdóttir og Kolfinnur frá Efri-Gegnishólum stóðu sig feikna vel í A-úrslitum ungmenna fyrr í dag. Var sýning þeirra einstaklega jöfn og áferðarfalleg en góð reiðmennska og mikil afköst á gangi skiluðu þeim 8,83 í einkunn og fyrsta sætinu. Næstir á eftir þeim urðu svo sigurvegarar B-úrslitanna, þeir Þorgeir Ólafsson og Hlynur frá Haukatungu Syðri 1 með einkunnina 8,67.

Konráð Valur og Kjarkur frá Árbæjarhjáleigu II fóru mikinn í kvöld, sem er þeirra von og vísa og sigruðu þeir 100 metra flugskeiðið. Jafnframt er búið að staðfesta heimsmet þeirra félaga í 250 m skeiði sem þeir settu í gærkvöldi og eru þeir því tvöfaldir Landsmótssigurvegarar í skeiði!

Sýningar ræktunarbúa fóru fram í gærkvöldi þar sem 11 bú komu fram með hross úr þeirra ræktun. Er það einkar skemmtileg leið fyrir ræktunarbú til að sýna afrakstur sinnar ræktunar og sjá aðra. Áhorfendur gátu svo kosið um besta ræktunarbúið en það var Þúfur í Skagafirði sem vann þá kosningu. Þau komu því aftur fram í kvöld, enda ekki leiðinlegt að sjá slíka kostagripi oftar en einu sinni.

Flokkur 6 vetra var í einu orði sagt magnaður, tveir heimsmethafar mættu til leiks, þeir Þráinn frá Flagbjarnarholti og Kveikur frá Stangarlæk 1 og stóðu þeir heldur betur undir væntingum. Þráinn sigraði flokkinn með 8.92 í aðaleinkunn en Kveikur var næstur á eftir honum með 8.76 í aðaleinkunn, klárhestur með 10 fyrir tölt og vilja og geðslag.

Landsmótið í Reykjavík hefur gengið frábærlega hingað til, fram hafa komið einstakir knapar og gæðingar, heimsmet hafa verið slegin bæði í skeiði og kynbótadómi og tveir knapar riðu sig í hæstu einkunn sem gefin hefur verið í forkeppni í tölti T1 á Íslandi. Ekki má heldur gleyma ungu knöpunum sem hafa staðið sig frábærlega á mótinu og gefa þeim fullorðnu ekkert eftir.

Adrían frá Garðshorni á Þelamörk átti frábæran dag í gær, hækkaði sig frá því í forskoðun og fór þar með yfir Spaða frá Stuðlum sem stóð efstur fyrir yfirlit. Hlaut Adrían 8.63 fyrir kosti, sköpulag og í aðaleinkunn. Þór frá Torfunesi kom svo fast á hæla honum með einkunnina 8.62 í aðaleinkunn og var Spaði frá Stuðlum þriðji með 8.55 í aðaleinkunn.

Heimsmetið í 250m skeiði var slegið nokkrum sinnum í gærkvöldi en nýjasta heimsmetið settu snillingarnir Konráð Valur Sveinsson og Kjarkur frá Árbæjarhjáleigu II en þeir fóru á tímanum 21,15 í síðasta spretti sínum á mótinu.

Rúnar Þór Guðbrandsson, eigandi Hrímnis, verður með fyrirlestur í Horses of Iceland tjaldinu í dag, laugardag kl 1615 – 16:45 um nýja Hrímnis hnakkinn og virkni hans.