Árblakkur frá Laugasteini mun sinna hryssum á Stóra-Hofi í Rangárþingi það sem eftir er sumars. Árblakkur er einstaklega mjúkur, flinkur og jafnvígur alhliða gæðingur, með úrvals gott geðslag. Hann hefur hlotið hæðst 9,20 fyrir hæfileika, 8,28 fyrir sköpulag og aðaleinkunn 8,83

Ákveðið hefur verið að framlengja skráningarfrest á Íslandsmót til miðnættis fimmtudaginn 12. júlí. Hestamannafélagið Hörður mun halda punktamót þann 12. júlí fyrir þá sem vantar einkunn fyrir Íslandsmót. Að öðru leyti bendum við á áður birtar auglýsingar varðandi skráningu á Íslandsmót.

Vegna mikillar eftirspurnar hefur mótanefnd Harðar ákveðið að halda punktamót fyrir Íslandsmótið. Skráning á mótið er hafin inn á sportfeng og stendur til miðnættis miðvikudagsins 11.júlí. Mótið hefst klukkan 18:00 fimmtudaginn 12.júlí.

Trymbill frá Stóra-Ási og synir hans, Kalsi og Sólon frá Þúfum taka á móti hryssum á Þúfum frá og með deginum í dag. Hægt er að bæta inn á þá.

Aðalheiður Anna Guðjónsdóttir sópaði að sér verðlaunum á nýafstöðnu Landsmóti Hestamanna en hún hlaut einnig ný verðlaun, Isibless reiðmennskuverðlaunin. Eru þau veitt þeim knapa sem sýnir einstaka reiðmennsku og fáguð samskipti við hestinn. Er hún vel að þeim verðlaunum komin, enda Aðalheiður búin að uppskera einstaklega vel á Landsmótinu og sýna frábæra fagmennsku og færni.

Mánudaginn 9. júlí 2018 verður opið hús í hesthúsinu í Kjarri í Ölfusi frá kl. 13.00-18.00. Höfðinginn Stáli frá Kjarri verður á staðnum og nokkrar ræktunarhryssur með folöldum sínum. Einnig verða í hesthúsinu söluhross á ýmsum stigum. Heitt á könnunni, allir velkomnir!

Síðasta atriði Landsmóts 2018 voru A-úrslit í A-flokki og voru þau ekki af verri endanum. Hafsteinn frá Vakursstöðum og Teitur Árnason mættu gríðarlega öruggir til leiks en þeir voru efstir inn í þessi úrslit og héldu þeir sæti sínu allt til enda, lokaeinkunn þeirra 9,09. Atlas frá Lýsuhóli og Jóhann Kristinn Ragnarsson voru næstir á eftir þeim með einkunnina 8,84.

Æsispennandi A-úrslitum í barnaflokki er nú lokið og fóru þau svo að Guðný Dís Jónsdóttir sigraði á hinum glæsilega Roða frá Margrétarhofi með einkunnina 8,88. Verðskuldaður sigur hjá þessu frábæra pari. Sigurður Steingrímsson var í öðru sæti á Elvu frá Auðsholtshjáleigu með 8,82 og Ragnar Snær var þriðji á hinum margreynda Kamban frá Húsavík með einkunnina 8,81.

Það var mjótt á mununum í A-úrslitum unglingaflokks í morgun. Benedikt Ólafsson á Biskup frá Ólafshaga og Védís Huld Sigurðardóttir á Hrafnfaxa frá Skeggsstöðum voru jöfn með einkunnina 8,70 en Benedikt sigraði á aukastöfum. Júlía Kristín Pálsdóttir var svo í þriðja sæti á hinum flinka Kjarval frá Blönduósi með einkunnina 8,69.