Arion var búinn að vera í hryssum í Austvaðsholti í sumar, líkt og undanfarin ár og er talið að hann hafi verið sleginn í nótt sem orsakaði brot í bógi. Óumflýjanlegt var því að fella hestinn. Slysin gera því miður ekki boð á undan sér, eins og máltækið segir. 

Arion kom fyrst fram 4 vetra gamall á Landsmóti 2011 á Vindheimamelum og kom þá strax í ljós þeir gæðingstilburðir sem hann bjó yfir, þegar hann hlaut 9 fyrir tölt, vilja og geðslag og fegurð í reið. Hann hlaut sinn hæsta dóm 7 vetra gamall en þá jafnaði hann hæfileikaeinkunn hæsta dæmda hests í heimi á þeim tíma, Spuna frá Vesturkoti, þegar hann hlaut 9.25 fyrir hæfileika. Þar af hlaut hann 10 fyrir tölt og hægt tölt. Knapi hans hefur ávallt verið Daníel Jónsson.

[video1]

Arion var ekki einungis hæfileikamikill afkastahestur, heldur var hann jafnframt afar geðgóður og mikill höfðingi. Hann var mikill vinur hinnar 2 ára gömlu Dagmar Daníelsdóttir, dóttir Daníels Jónssonar og Lóu Dagmar Smáradóttur. Arion fór meira að segja í heimsókn í leikskólann hjá Dagmar í sumar, líkt og Vísir greindi frá og sjá má hér.

Arion á nú rúmlega 300 skráð afkvæmi, en þeim fjölda á eftir að fjölga þegar skráningar koma inn frá sumrinu sem er að líða og þeim sem fæðast á næsta ári. Þetta eru sannarlega harmtíðindi fyrir metnaðarfulla ræktendur þar sem Arion er búinn að vera vinsæll undaneldishestur í mörg ár, en afkvæmin sem hingað til eru komin munu vonandi bera föður sínum gott vitni í framtíðinni og halda heiðri hans á lofti um ókomna tíð.